BERROBI

Elgoibarren, herenegun, Izeta II.ak ez zuen izan inolako arazorik txapela janzteko. Azkenean lau kirolari izan ziren lehian, eta bakoitzak 100 kiloko zilindro zaharra, kubikoa eta bola erabili zituen. Lanerako, berriz, hiruna minutu izan zituzten. Izeta II.ak aise irabazi zuen. Bere semea izan zen bigarren, eta borrokarik handiena hirugarren posturako izan zen, Astorkia eta Urrutiaren artean, baina lehenengoa gailendu zen jasoaldi bakar bategatik.

Berrobin atzo sekulako jendetza batu zen bertako harri baldarrarekin jokatu zen lehenengo lehiaketan. Hasieran bost ziren izatekoak, baina Goenatxo ez zen joan. Lesioren bat badu, eta ez zegoen atzo lehiatzeko moduan. Lau harri-jasotzaileek 127 kilo pisatzen zuen harri baldarra erabili zuten, eta hiru minutuko bi txanda izan zituzten lanerako. Izeta II.a ongi nagusitu zen. Hamarna jasoaldi eman zizkion txandako. Ostolatza izan zen bigarren; zazpina jasoaldi eman zizkion. Izeta III.a izan zen hirugarren eta laugarren Irigoien, biak berdinduta, baina Izetak pisu gutxiago duenez gero, beretzat izan zen hirugarren postua. Telleria II.ak lehiaketaz kanpo jasoaldi bat eman zion harriari.