Gose-greba utzi du ordain ziezaiotela eskatzen zuen margolariak
BAIONA
Joan den ostiralean, arratsaldeko sei eta erdietan, Ostankoako margolari Roger Idiartek gose-greba hasi zuen Baionako Industria eta Merkataritza Ganberaren aitzinean. Atzo arratsaldean, margolaria sostengatzeko taldea sortu behar zuten mementoan, bitartekari bati esker, Roger Idiartek gose-greba utzi zuen. Idiartek etxebizitza-sustatzaile Cantois jaunaren trikimailua salatu nahi zuen gose- grebaren bitartez. Izan ere, Biarrizko hogei apartamentu margotu ondoren, Cantois jaunak ez baitzion lana ordaindu nahi izan. Etxebizitza-sustatzaileak Roger Idiartekin duen zorra 30.000 eurokoa da. Margolariak aditzera eman zuen egindako lanaren ordaina ez bazuen jasotzen, bere enpresaren etorkizuna zalantzan egongo zela eta berarentzat lan egiten duten bost pertsonen lanpostuak arriskuan izango zirela. Bitartekariaren lanari esker, etxebizitza-sustatzaileak Idiarti esan dio etxebizitzak saltzen dituenean 10.000 euro ordainduko dizkiola. Arazoa da Cantois jaunaren hitzak ez duela balio handirik, horregatik bai Idiart, baita Eraikuntzaren Federazioa ere ordainaren zain adi daude. Idiartek, egindako lanagatik ordaindu diezaiotela ez ezik, Sud Invest eta Uhaina sozietateetako jabeak etorkizunean horrelako trikimailuak ezin egin izatea ere zuen helburu, eta gose-grebarekin Cantoisek egiten dituen trikimailuak agerian gelditu dira. Izan ere, etxebizitza-sustatzailea epaitegietan eta enpresa munduan oso ezaguna da mota horretako arazoengatik.
|
