CCOOk Lakuaren plan estrategikoa kritikatu du
·Lan istripuak gutxitzeko sailen arteko elkarlana ez duela aurrez ikusten gaitzetsi du
BILBO
CCOO sindikatuko Lan Osasuneko arduradun Jesus Uzkudunek Gasteizko Gobernuak 2007 eta 2010 urte bitarterako prestatutako plan estrategikoa kritikatu zuen, atzo, Bilbon egindako prentsaurrekoan. Hain zuzen ere, Justizia, Lan eta Gizarte Segurantza Sailak lan istripuak gutxitzeko aurkeztutako testuak ez duela departamenduen arteko elkarlana aurrez ikusten gaitzetsi zuen. Elkarlan horrek herri lanak esleitzeko orduan segurtasun arloko legeak betetzen ez dituzten enpresei betoa jartzea ahalbidetuko lukeela adierazi zuen, baita enpresei diru-laguntzak ez ematea ere.
Era berean, CCOO sindikatuko ordezkariak nabarmendu zuen plan hori antzua izango dela akordio orokor bat ez bada lortzen eragile guztiekin. Alde horretatik, gogora ekarri zuen ELAk eta LABek ez zutela parte hartu Gasteizko Gobernuak deitutako bileran.
Bestalde, Uzkudunek CCOO sindikatuak planteatutako neurriak aurkeztu zituen atzoko agerraldian, neurri horiek «gizarteratzeko» helburuarekin.
|
