Giro paregabea eta jende ugari Aiarako Gazte(txe) Egunean
URDUÑA
Azken hilabeteetan lan handia egin dute, baina merezi izan du, Aiarako Gazte(txe) Eguna primerako giroarekin egin baitzuten Urduñan. Eguerdian ekin zioten eguneko egitarauari aurkezpen parodiarekin eta Poteo-tinbaleo jendetsuarekin.Bazkatzeko ehun bat lagun batu ziren, eta guztiek bazkalostean Xabi, Fredi eta Itxaso Paia bertsolariek osatutako saioa entzuteko okasioa izan zuten. Arratsaldean, berriz, kale kontzertuak egin zituzten, eta gauean Habeas Corpus, Banda Batzoki eta Amaiur taldeen kontzertuak gaztetxean. Atzoko egunarekin «aspaldidanik instituzioek gazteekiko darabilten axolagabekia» salatu nahi izan zuten. «Gazteon iniziatibak babestu beharrean, oztopoak bakarrik jartzen dizkigutelako», azaldu zuten. Era berean, Gazte(txe) Egunaren beste xedeetako bat Aiarako gazte mugimenduaren berrindartzea zuten. Egunen zehar aipamen berezia egin zioten desalojo arriskuan dagoen Urduñako Gaztetxeari.
|
