Inoiz izan den balio eskaintza publikorik handiena, Txinako Merkataritza eta Industria Bankuarena (ICBC), alegia, gorakada handiekin estreinatu zen Hong Kongeko burtsan. Ez zituen horren igoera nabarmenak izan, ordea, Shanghaikoan.

Inbertsoreek Hong Kongeko burtsaren eskaintzari gogotsu erantzun zioten. Konpainiaren akzioak 0,46 dolarren truke aldatu ziren saio hasieran, balio eskaintza publikoan baino %17 garestiago, hain zuzen.

Itxieran, hala ere, akzioak pixka bat merkeago saldu ziren, 0,45 dolarrean.

Shanghain, aldiz, konpainiaren akzioek ez zuten horren harrera ona izan, eta saio hasieran 0,43 dolarreko prezioa eskuratu arren ­%9 garestiago­, egunaren bukaeran igoera ez zen oso altua izan, %5,13koa besterik ez.

Bankuko Jiang Jianqing lehendakariak estreinaldi egunean esan zuen bankuaren jokaerarekin «oso-oso kontetu» zegoela. Bi burtsetako akzioen salneurrien arteko aldea jaitsi egingo dela uste duela ere gaineratu zuen.

19.100 milioi dolar

Hong Kongeko debuta analistek aurrez ikusi zuten bezalakoa izan zen, baina Shanghaikoan lortutako irteerako prezioak baikorrenak ere desengainatu zituen; izan ere, haiek irekiera saioan %10 eta 15 bitarteko igoera espero zuten. Bankuak, hala ere, 19.100 milioi dolar eskuratu ditu eragiketa honekin, eta kopuruak gora egin dezake, 21.900 milioi dolarreraino. Horretarako, bankuak esleipenen gainean duen eskubidea erabili ahal du. Hauxe da inoiz banku batek balio eskaintza publiko baten sinaduragatik lortutako kopururik altuena; izan ere, NTT DoCoMo telefono mugikorren enpresa japoniarrak 18.400 milioi dolar lortu zituen 1998an, banku txinatarrak baino 700 milioi dolar gutxiago.