DONOSTIA

«Etorri! Etorri!», oihukatzen zuen Odon Elorzaren plantak egiten zituen mutilak. «Etorri parte-hartzearen gailurra den udaletxera! Proposatu, eman ideiak, gero nahi bezala kudeatuko ditugu-eta». Bitartean, bertze neska-mutil dotore batzuek «Nik egin nik jan! Yo me lo guiso yo me lo como» zioen pankartari eusten zioten.

«Udalak ekitaldi parte-hartzaile hau antolatzeko arrazoia herritarrek azken urteotan egindako lana da ­ziurtatu zuen Ekain Ormazabal Piratak­. Duela lau urte sortu genuen herri jaien aldeko mugimenduak ere egin du ekarpena, egitarau alternatiboa antolatu duelako, gure ustez behinik behin ofiziala baino askoz ere parte-hartzaileagoa».

Ez dakite Udalak lantegi hori egin izana garaipentzat har dezaketen. Baina Odon Elorza alkateak, Aste Nagusiaren balorazioa egin zuenean, kitatu beharreko zor bat bazuela aitortu zuen: gazte mugimenduekin hitz egitea. «Horregatik gaude gaur hemen, udaletxearen aurrean», baieztatu zuen Ormazabalek.

Geroago egingo dute Piratek ekitaldiaren balorazioa, edukia nola landu duten ikusita. Hala eta guztiz ere, metodologia zein den badakite, eta desegokia iruditzen zaie. «Hiriko hainbat sektoretako pertsonen ideiak jaso nahi dituzte, gero euren modura kudeatzeko. Ez dira denen arteko kudeaketa egiteaz mintzo behintzat. Zentzu horretan, beraz, ez zaigu ekimen positiboa iruditzen. Ona da lantegi parte-hartzailea egitea, baina beste modu batera planteatu beharko litzateke», azaldu zuen.

Piraten aburuz, askotariko egitaraua da jai guztien oinarria eta arrakasta. Udalak egitarau ofiziala eskaini behar duela uste dute, nahiz eta euskarari ematen dioten toki eskasa eta zezenketak gaitzesten dituzten. «Herri mugimenduek proposatutako ekitaldiak gauzatzeko bitartekoak jartzea ere badagokio, ordea, kudeaketa bideragarria izan dadin. Eta orain arte ez da hala gertatu».

Azkenik, bestetako ekitaldi asko hiri eredu jakin batentzat egin dituztela salatu zuen Ormazabalek, “euro-hiriarentzat”. «Herritar askok ez dugu hori nahi», erran zuen.