DONOSTIA

Hasiera batean bost ziren izatekoak, horiek lortu baitzuten finalerako txartela, baina azken orduan Luix Belarrak ezin izan zuen bertan izan, gaixorik baitago. Jendeak, berriz, erantzun handia eman zuen, erabat bete baitziren Doneztebeko pilotalekuko harmailak, atzoko jaialdia ikusteko.

JonRekondo zen faboritoa, baina oraindik oso gaztea da, eta horrelako finaletan irabazi ezinik ere geratu da behin baino gehiagotan. Zaleek bazuten errezelo apur bat, baina leitzarrak lehen enborretik bidali zituen susmo horiek denak, jaun eta jabe izan baitzen atzoko finalean.

Hasieratik hartu zuen aurrea, eta lehen postua berehala erabaki zen. Oso ongi dago, eta teknikoki oso aizkolari ona da, jendearentzat gustagarria, eta atzo oso ongi prestatuta zegoela erakutsi zuen. Bigarrenari, ia bi minutu atera zizkion.

Postu horretarako hasieran borroka apur bat egon baldin bazen ere, berehala jarri zen hor Xabier Mindegia, eta ongi eutsi zion amaierara bitarte. Hirugarrengoan ere Amillano kokatu zen, eta hori ere hor geratu zen. Telletxea zen atzo herrikoa, baina ezin izan zuen, eta azken postuarekin konformatu behar izan zuen.

Sailkapena

Bi final horietaz gain, atzo Donezteben erakustaldi eder bat ere izan zen. Bertan, Larretxea, Nazabal eta Mindegia neurtu ziren. Zortzi enbor izan zituzten aurrez aurre, eta Larretxea izan zen onena. Sasoi betean dagoela argi eta garbi utzi zuen. Jendeak, ordea, Mindegia ikusi nahi zuen, berehala baitu apustua. Ezkurrakoa azkena izan zen Nazabalen atzetik, baina Etxarrikoak segundo bakar bateko alde kendu zion. Ezkurrako aizkolari beteranoak sasoi betean dagoela erakutsi zuen. Olasagastiren aurka hilabete barru neurtuko da.