Kalejira zaratatsua egingo dute gaur Karmelon
BILBO
Bilboko Karmelo ikastolak kalejira zaratatsua egingo du gaur, arratsaldean, Udalari eta Lakuako Gobernuari ikastetxe horrekin hartu zituzten konpromisoak bete ditzatela eskatzeko.
Bilboko Santutxu auzoan dagoen ikastetxe horretako ordezkariek azaldu zutenez, Udalarekin eta Gasteizko Gobernuarekin adostutakoaren arabera, Larreagaburun eraiki behar duten ikastetxean Haur Hezkuntza (HH), Lehen Hezkuntza (LH) eta Derrigorrezko Bigarren Hezkuntza (DBH) zikloak egokitu behar ziren. Egun, ordea, DBHz ez dutela hitz egiten esan zuten Karmelo ikastolako ordezkariek, eta eskola mapa berriaren emaitzen zain daudela azaldu zuten.
«Hedabideetako salaketak eta kalean egindako erreibindikazioak arazoari konponbidea emateko nahikoak izango zirela uste genuen, baina ez, berriz ere erratu ginen; administrazioak ez du arazoa konpondu, eta gure historiak aurrera jarraitzen du», azaldu dute ikastetxeko kideek prentsa adierazpen batean.
Horiek hala, erakundeen jokabidea «berriz ere salatu beharrean» daudela diote, eta horregatik kalejira zaratatsura deitu dute gaurko, ikastetxean bertan, 17.00etan. «Arazoaren konponbidea eskuan dutenek», Eusko Jaurlaritzak eta Bilboko Udalak, zentzuz joka dezatela eskatuko dute.
|
