IRUN
Nazioartean barrena dagoen diaspora Euskal Herrian ireki den prozesuaren alde lan egiteko prest dagoela adierazi du Udalbiltzak, eta epe motzean Argentinako euskal diasporak prozesuari bultzada emateko xedeaz hainbat ekimen abiatuko dituztela jakinarazi du. Azken hilabeteetan Euskal Herriko instituzioak nazioartean egindako lana aurkezteko helburuarekin, prentsaurrekoa egin zuen Irunen. Bertan, EuskalHerriko gatazkaren konponbidea Euskal Herrian bertan dagoela adierazi eta nazioarteko komunitatearen ekarpena ezinbestekotzat jo du. Bide horretan, Friendship-a sortzea edota euskal diasporak bai Idahon baita Txileko Senatuan ere egindako adierazpenak ekarri zituzten gogora.
Udalbiltza azken hilabetean Uruguain eta Argentinan barrena ibili da, eta bertan, hainbat instantziatako kideekin izandako harreman politikoetan Euskal Herriko egoera politikoak jakin-min handia sortzen duela ikusi du Udalbiltzak. EHNAren auziari dagokionez, «naziotasun eskubidearen gauzatzea» ikusten dela adierazi du Peio Gaskon Udalbiltzako kideak. EHNA bideratuta egindako ekarpen indibidualaren bidez, erabakitzeko eskubidearen jarrera kolektiboa sendotzen doala argudiatu du.
Euskal Herriaren aldarrikapenak nazioarteko hainbat esparrutan ezagutarazten jarraitzeko konpromisoa berretsi du Euskal Herriko instituzioak.
Beste alde batetik, nazioarteko eragile eta pertsonei prozesu politikoa sustatzeko deialdia egin die Udalbiltzak. Bide horretan, nazioarteko eskubideen inguruko itunetan bildu izan diren eskubideak Euskal Herrian aitortu eta bermatu daitezen babestuz lan egiteko deialdia egin du.
