LABek nabarmendu du hauteskundeetan gehien hazi dena dela
GASTEIZ
Irailean hasi zen hauteskunde prozesu trinkoan gehien igo den sindikatua dela nabarmendu du LABek, abenduaren 1a arte lortutako emaitzak aztertu ondoren.Izan ere, sindikatu abertzaleak azaldu zuenez, Nafarroan prozesu trinko hori datorren urtarrilean hasiko da eta, horregatik, Araba, Bizkai eta Gipuzkoako datuak erabili ditu. LAB gehien Gipuzkoan eta Bizkaian hazi zen, eta Araban igoera arinagoa izan da. Bestalde, Bizkaian LABek UGTrekin 150 ordezkariren aldea baino ez duela adierazi zuen. «Joera hau abenduan eta urtarrilean are nabermanegoa izango da», adierazi zuen sindikatuak. LABen datuen arabera, Araban, Bizkaian eta Gipuzkoan, duela lau urte ELAk ordezkarien %40,42 zituen; joan den irailean hauteskundeak hasi zirenean, %40,70; eta orain, %40,08. LABek, berriz, %15,86 zituen duela lau urte; %16,15, irailean; eta %16,68, gaur egun. CCOOk %18,55 zituen duela lau urte; %19,86 hauteskundeak hasi zirenean eta %20,06 igo da orain. UGTk, %15,13 zituen 2002an; %13,69, irailean; eta %13,49 du orain. Azkenik, ESK-k %1,74 zuen duela lau urte; %1,57, irailean; eta %1,54 abenduaren hasieran.
|
