GASTEIZ
Gasteizko museokoek jakinarazi bezala, programa honetan parte hartzen duen idazle bakoitzak Artiumen katalogoko lan bat aukeratu eta hortik abiatuta prestatzen du hitzaldia. Eta Sagastizabalek Francesc Torres katalanaren “Occident” hautatu du.
Joxean Sagastizabalek (Eibar, 1956) 1983an kaleratu zuen bere lehenbiziko liburua, “Jolasean” izenburupean, baina “Kutsidazu bidea, Ixabel” eleberriak egin zuen ospetsu euskal irakurleen artean, antzerkira ezezik zinemara ere eraman dutena dagoeneko. Harrezkero, beste zenbait lan argitaratu ondoren, “Nomadak kantari doaz” kasu, Sagastizabalek bere lehen nobela arrakastatsuaren gaiari heldu dio berriz eta “Kutsidazu berriz, Ixabel” 2006an plazaratu du.
“Arterako hitzak” programan parte hartzeko, idazleak Francesc Torres katalanaren “Occident” lana hautatu du, eta hortik abiatuta emango du hitzaldia literaturaren eta komikien inguruan.
“Occident” 1991n egin zuen Bartzelonako artistak eta normalean elkarrekin egoten ez diren eguneroko objektuak lotzen ditu eta esanahi berri bat ematen die: kutxa-izozkailu bat eta komiki bilduma bat.
Torres New Yorken bizi da 1974tik, eta hainbat museotan erakutsi izan ditu bere lanak, Madrilgo Reina Sofian, Guggenheim Bilbao Museoan zein Artiumen, besteak beste.
Bestalde, “Arterako hitzak” egitasmoaren barruan Angeles Caso idazle asturiarrak ere hitzaldia egingo du otsailean. Museoko programa originalak UnaiElorriaga euskal idazlea ere gonbidatu du euskaraz beste hitzaldi bat eman dezan.
