- Idi-probak
Letearen uztarriak eraman ditu Debako mantak
DONOSTIA
Letearen uztarriak eraman ditu Debako probetako mantak. Lehenengo asteburuan egindako marka azkenekoan ezin izan du inork ondu, eta amaieran mantak Errezil aldera joan ziren. Urrutia eta Telleria izan ziren itzain.Txausonen uztarria zen garaipena lortzeko faboritoa, baina arabarraren idiak ezin izan ziren orain arteko maila berean aritu, eta amaieran laugarren postuarekin konformatu behar izan zuen. Bestetik, Subinasen idiek eraman zuten herriko lehenengoaren saria, baita kintopekoen lehenengoarena ere. Amaieran, seigarren postuan amaitu zuen. Lopene eta Iketza izan zituzten itzain idi horiek. Proba hauetan jendearen erantzuna ere nabarmentzekoa izan
da, ia egunero jendetza handia batu baita Debako probalekuan, nahiz eta gehien
azkeneko egunean izan zen, harmailak bete baitziren. Berrizen izango dira
idi-probetako hurrengo ekinaldi garrantzitsuak, nahiz eta Abadiñokoak ere laster
izango diren. Azken herri horretakoak dira, Debakoekin batera, Euskal Herrian
egiten diren garrantzitsuenetakoak.
Mendata
Mendatan asto-probak ari dira jokatzen, eta lehenengo bi jardunaldien ostean, Aixerdiren astoa doa lehen postuan 61 untze, 1/2 eta 5,65 metro eginda.Oraindik, ordea, beste hiru ekinaldi geratzen dira, eta badago marka hori apurtzeko tartea. Larunbatean izango dute proba horiek jarraipena, 18.00etan, Satsibarren, Gaunasen, Gerenabarrenaren, Zabaletaren eta Narbaizaren astoekin. Igandean ere, 18.00etan hasiko dira probak, Bilbaoren, Intxaustiren, Urrolaren eta Ormaetxearen astoekin. Azkeneko saioa, berriz, astelehenean jokatuko da.
|
