Bakearen alde «mugitzeko» deia egin du biharko Bilboko Apezpikutzak
BILBO
Elkarretaratzea deitu du bi- harko Bilboko Apezpikutzak Santiagoko Katedralaren aurrean, 18.00etan. Atzo bertako agintari nagusi eta Apezpiku-batzar espainoleko buru den Ricardo Blazquezek iragarri zuenez, helburuak bakearen alde «mugitzea», «urratsak ematea» eta «orain arte landu ez diren bideak zabaltzea» dira.
Mezu hori biltzen duen adierazpena ezagutzera emango du ekitaldian Ricardo Blazquez apezpikuak. Izan ere, «gure herriak hainbeste maite duen bake iheskorrari begira egoera zai- lean gaude», eta hori da bere ekimenaren funtsa.
Ricardo Blazquezek ziurtatu zuenez, biharko elkarretaratzeak «ez garela ikusle soilak, era batera edo bestera, protagonistak ere bagarela» islatu nahi du. Eta horrekin batera, baita «indarkeriazko gatazka hau ez dagoela kristau komunitatetik kanpo, Elizaren barruan ere eragina izan du-eta».
Oraingoz zehaztu ez dituen «mugimenduak» eskatuko omen ditu apezpikuak bere mezuan. Izan ere, atzo nabarmendu zuen, «bakerantz doan bideak mugitzea exijitzen duela» eta «begirada kritikoa eskatzen duela: iraganari kupidarik gabe begiratu behar zaio, orainaldiari samurtasunez eta etorkizunari konfiantzaz», gai- neratu zuen.
Elizak bakearen alde askotan egin duela erantsi nahi izan zuen. Horren adibide gisa, Urkiolara egindako hiru ibilaldiak, Bilboko Erakustazokan egindako «zortzi orduko topaketa» eta Armentian egin zen «Guztien artean, guztiontzako bakea» ekitaldia jarri zituen.
|
