![](http://www.gara.net/naiz/naiz.gif)
Datorren urtean Erasmus bekekin zer gertatuko den kezka sortu da
GARA | DONOSTIA
Hezkuntza Ministerioko erregistrora eraman zituen atzo Laura Zornoza Kazetaritza eta Ikus-Entzunezko Komunikazioko ikasleak Erasmuseko diru laguntzak kentzearen kontra Internet bidez jaso dituen 200.000 sinadurak. Bertan Federico Moranekin bildu zen, Unibertsitateetako idazkari nagusiarekin.
Ikasle honentzat «garrantzitsuena borrokan jarraitzea da, erabateko zuzenketa egin dezaten eta beka orokorra ez duten ikasleei ere Gobernuak dirua bermatu diezaien», ez soilik ikasturte honetarako, baita hurrengoetarako ere.
Sinadurak entregatu eta Moranekin solastatu ondoren, adierazi zuen Unibertsitateetako idazkariak ez diola bermatu datozen ikasturteetarako Gobernu espainolak diru laguntza horiek emango dituenik. «Beraz, ez zait argi gelditu zer gertatuko den», gehitu zuen Zornozak.
«Behin betiko irtenbidea nahi dugu, ez dadila zulo bat estaltzea izan. Mugituko ez bagina, zer gertatuko litzateke, bere horretan geldituko litzatekeela?», galdegin zuen.
Era berean, kritikatu egin zituen Hezkuntza Ministerioak aldaketa egiteko erabilitako moduak. Estatuko Aldizkari Ofizialean argitaratuta zegoen, baina Zornozaren hitzetan, «kasualitatez jakin genuen». PPren asmoa «atzera egiteko beranduegi izatea» zen.