DIYARBAKIR
Festa giroa eta eskubideen aldarrikapena izan dira nagusi aurtengo Newroz egunean. Agintari turkiarrek aurreikusi zituzten istilu larriak ez dira gertatu, nahiz eta 3.000 poliziakide zeuden Feria Plazatik gertu, hau da, Diyarbakirko hirigunetik hamar kilometrora.
PKK Kurdistango Langileen Alderdiak azken asteotan egin dituen erasoak direla-eta, agintariek segurtasun neurriak indartzea erabaki zuten.
Turkiako Estatuak preso daukan Abdullah Ocalan PKKko buruaren irudia bazter guztietan ikus zitekeen, bera baita «Apo presidentea» Ankarako Gobernuaren menpe bizi diren kurdu askorentzat.
Ahmet Turk DTP Gizarte Demokratikoaren Alderdiko presidenteordeak adierazi du Newroz egunaren antolatzaileek bere esku zegoen guztia egin zutela festa era baketsuan ospa zedin. Parte-hartzaileek bandera kurduaren koloreekin berdea, horia eta gorria estali dute plaza, nahiz eta debekatuta dagoen. Ocalan askatzeko eskatu dute, eta preso politiko guztiak hartuko lituzkeen amnistia. «Amnistia osoa bakea lortzeko» irakur daiteke pankarta batean. «Biji serok Apo» (gora Apo presidentea) oihukatzen dute manifestariek.
Ocalanen abokatuek PKK-koaren mezua irakurri diete esku-hartzaileei. Presoak eskatu dio Erdoganen Gobernuari amnistia osoa eman dezala. «Ez dut gerrarik nahi», esan du. Makina bat lagunek sinatu dute bere askatasuna eskatzen duen eskaria.
«Milioika lagunek esaten badute Ocalan dela beren burua, Estatuak solaskide egoki moduan onartu beharko du esan du manifestari batek. Kartzelan daukaten bitartean, ez da bakerik izango».
