DONOSTIA

Atzo, kana-erdikoa zutik moztuz ekin zioten lanari, eta hor Arrospide nagusitu zen. 2.08 izan zen bere denbora, eta hogei segundo gehiago behar izan zituen Arantzakoak.

Gero, 45 ontzakoa zeinek kolpe gutxiagotan moztea zen egin beharrekoa, eta hor nafarra gailendu zen. 32 kolpetan erdibitu zuen enborra, eta lau gehiago behar izan zituen gipuzkoarrak. Gero, berriro ere 45 ontzakoa zuten aurrez aurre, baina erlojuaren kontra aritu behar ziren, eta berriro ere Larretxea nagusitu zen, nahiz eta segundo bateko aldea atera. 44tan bota zuen Arantzakoak.

Leaburukoak, aurrekoen ordaina eman zion 60 ontzakoarekin. Hor zeinek azkarrago moztu aritu ziren, eta 2.24n amaitu zuen lana. Bost segundo gehiago behar izan zituen nafarrak.

Azkenik, bi 45 ontzako, bi kana-erdiko eta bi 60 ontzako moztu behar zituzten, eta hor Larretxea nagusitu zen, baina ezin izan zuen lehendik galduta zuen denbora berreskuratu, eta azkenean kanpoan geratu zen. 16 minutu eta 42 segundo izan zen bi aizkolariek egindako azkeneko denbora.

Gaur, beste multzoan, Nazabal eta Txapartegi neurtuko dira Karrantzan, 12.00etan hasita. Finalerdietarako azkeneko txartela egongo da jokoan. Txapartegi irabaztera behartuta dago, bestela lehiaketatik kanpo geratuko baita. Irabaziko balu, multzoko hiru aizkolariak berdinduta geratuko lirateke, eta denen denborak hartuko lirateke kontuan sailkapen bat egiteko. Nazabalek irabaziko balu, bera izango litzateke multzoko lehenengoa, eta Olasagasti bigarrena eta, beraz, horiek egingo lukete aurrera.

Gauzak normal joanda, Floren Nazabalek bereganatu beharko luke gaurko saioa, nahiz eta Txapartegik galtzeko ezer ez duen.

Bestalde, atzo 23 urtez azpikoen saioa ere jokatu zuten, eta Atutxa II.ak Rekondori irabazi zion. Azkeneko lan luzean erabaki zuen bizkaitarrak, eta finalerdietan sartzeko aukera asko ditu orain. 12.25 izan zen bere azkeneko denbora, eta 12.32 Rekondorena. Azkeneko jardunaldian Mabier Mindegia izango du aurrez aurre.