Bizkaiko Metaleko patronalak itxitzat jo du hitzarmen kolektiboaren negoziazioa
·Sindikatuek hitz egiteari «etengabe» uko egin diotela salatu du Metalgintza sektoreko enpresen federazioak
BILBO
Bizkaiko Metalgintza sektoreko enpresen federazioak (FVEM) bukatutzat eman du 2006. urteko hitzarmen kolektiboko negoziazioa. Hori adierazi zuen atzo, sindikatuek hitz egiteari «etengabe» uko egin diotela argudiatuta. Horiek hala, hitzarmenak eragiten dien herrialdeko sektoreko enpresa guztiei %3,2ko soldata igoera aplikatzea gomendatzen die 2005. urteko taulak oinarri hartuta.
Urteko lan jardunaldiari dagokionez, egungo 1.688 orduak mantentzen ditu; 1.708 ordu jardunaldi zatitua bada.
Bizkaiko patronalaren adierazpen horiek direla-eta, zenbait sindikatuk iritzia eman zuten atzo. Metalgintza sektoreko ELAko idazkari nagusi Dani Gomezek esan zuen enpresaburuen jarrera ez dela berria. «Azken urteetan hitzarmenaren negoziazioa blokatzen ari da patronala, betiere, besteren artean, behin-behinekotasuna, aberastasunaren banaketa, bigarren soldata eskala eta enpresa barruko soldata diskriminazioa gaiak ez eztabaidatzeko helburuarekin».
CCOO sindikatuak, berriz, patronalak beste behin «harrokeriarekin» jokatu duela kritikatu zuen. «Egungo negoziazio eredua hiltzat jo nahi du, lan harremanak indibidualak izan daitezen», adierazi zuen. Azkenik, «ireki ez den mahai bat itxi dutela» salatu zuen.
|
