Ohiko puntualtasun falta txikiarekin ­ordu laurden eskas­ goizeko hamarretan zegoen hitzordua atzo Zarauzko paseale- kuan, Euskal Selekzioen VIII. Eguna izan baitzen, Euskal Herriko kirol ezberdinetako selekzioen ofizialtasuna behingoan gerta dadin eta hori hala izan dadin eman beharreko pausoak eman daitezen beste behin eskatzeko.

Zarauzko hondartza jendez lepo zegoen goizeko lehenengo unetik, eguraldi onaz ­lainoz estali samarra, hori bai­ profitatzeko beta baitzegoen. Horietako hainbat eguna hondartzan pasatzearren joan baziren ere, gehienak euskal selekzioen ofizialtasunaren aldeko jaialdira batu ziren, egun osoan izan ziren kirol ekintza ezberdinak ikustera eta ESAITeko kideek antolatutako karpetan kamisetak erosi edo txosnetan zerbait hartzera.

«Urtero formatu bertsua erabiltzen dugu euskal selekzioen eguna ospatzeko» ­aipatu zuen Martxel Toledok, ESAITeko koordinatzaileak­. Egin dugun aldaketa urte bakoitzean herrialde batetik pasatzen garela da. Oiartzunen hasi ginen, iaz Algortan izan genuen hitzordua eta, Senpere, Bilbo, Arbizu eta Agurainetik pasatu ostean aurten Zarautza etorri gara».

Egun osorako zazpi eremu ezberdinez osaturiko ibilbidea zegoen prestatuta hondartzan. Orotara, «Zazpiak federazio bat» lelopean, ESAIT aurrera eramaten ari den kanpainak, Zazpiak Federazio bat, kirolaren esparruan eta diziplina desberdinetan nazio mailako antolakundeak sortzea zuen helburu.

Aldarrikapen horrekin 330 kirol elkartek bat egin dute, baita 11.000 kirolari federatuk ere. Hasteko egon zen kirol ekitaldia Zarautz eta Zumaiako beteranoen arteko futbol parti- da izan zen. Jendea partidaren ingurura hurbiltzen ari zelarik beste ekintza zenbait jarri ziren martxan; hala nola, eskubaloi partida Zarautz Kirol Elkarteko zenbait jokalarirekin, surf erakustaldia Zarauzko Surf Elkartearen eskutik edota pasaka pilota partida, Iparraldea Hegoaldearen aurka, baita Wushu-Kung Fu eta Taichi erakustaldia ere. Bazkalordua baino lehen gizonezko eta emakumezkoen boleibol partidak jokatu zituzten eta halterofilia erakustaldi baten ostean iritsi ziren eguerdiko etenaldira.

Bazkalostean ekintza ugarik alaitu zuten Zarauzko pasealekuko giroa. Arratsaldeko 16.30etik aurrera xake partidak eta saskibaloi neurketak izan ziren. Dena dela, arratsaldeko ekintzarik garrantzitsuena 18.30etik aurrera jokaturiko herri kirolak izan ziren, «Xiba» proiektuak antolatua.

Bestalde, kirol ekintzez gain, haurrentzako puzgarriak egon ziren egun osoan eta makina bat jende bertaratu zen postu ezberdinetara ESAITekoen kamisetak eskuratzearren, beste hainbat alditan bezala ia-ia agortu ziren arte. Eguna arratsaldeko bederatzi eta erdietatik aurrera amaitu zen ofizialki, Triki Ta Ke taldearen erromeria izan baitzen.

Manifestua

Eguneko kirol ekintza guztiak baino lehen, berriz, goizeko hamarrak pasatxoan eman ziren atzoko egun bereziko lehenengo pausoak.

Lehenik eta behin, ikurrina igo zuten Zarauzko pasealekuan eta, horren ondotik, Euskal Selekzioen Aldeko iritzi Taldeak eta Kataluniako Plataforma Proselecciones Esportivas Catalanes taldeak manifestu bateratua irakurri zuten estatu gabeko bi nazio hauen kirol federazioen aitorpena lortzeko xedez.

Lehenengo Euskal Selekzioen Egunean Oiartzunen egin zuten moduan, Euskal Herriko eta Kataluniako selekzioen «kirolaren normalizazioa eta burujabetza» aldarrikatu zuten, aldarrikapen guztiak hiru puntutan oinarrituz.

Batetik, Kataluniak eta Euskal Herriak kirol ekitaldi orotan parte hartzeko aitorpena eta Estatu espainolak eta frantsesak inolako trabarik jarriko ez dutelako aldarrikapena. Bigarren, kirol federazioen nazioarteko onarpena lortzeko beharrezko lege aldaketak burutzeko konpromisoa. Hirugarren, berriz, Kataluniako zein Euskal Herriko selekzioa defendatzen duten kirolarienganako errespetua.

Helburu eta bitarteko horiekin, agintariei ez dezatela «entzungor egin» eskatu zieten manifestua amaitzeko.

«Kataluniako plataformarekin hitzarmen bat sortu genuen lehenengoz bildu ginenean. Plataforma horren inguruan harreman zuzena daukagu, baita hango kirol federazioen batasunarekin ere. Lan hitzarmen bat sinatu genuen bere garaian eta orain berriro berresten dugu. Orain dela gutxi gu geu ere Katalunian izan ginen beraiek antolatu zutelako lehenengo eguna eta aurten beraiek etorri dira eta oso pozik gaude», adierazi zuen Martxel Toledok. -

ZARAUTZ