DONOSTIA
ACB ligara igo berri den Bruesa GBC taldeak beste fitxaketa bat aurkeztu zuen atzo, Anoetako Kirol Etxean. Jose Amador hegal-pibot alacantarra, opor kontuak direla-eta, bi urterako fitxaketa publiko egin eta astebetera eman zen ezagutzera atzo Donostiako prentsa eta zaleen aurrean. 23 urteko gizon horrek bere 2,10 metro eta 100 kiloak ACB ligan lehenengo aldiz erabiliko ditu aurten, orain artean Valentziako Pamesa taldeak utzita LEB2 ligan Pamesa Ceramica Castellon taldean jokatu baitu azken bi urteetan, nahiz eta Valentziako talde nagusiarekin entrenatu.
Bruesa GBC taldeko barneko jokoa indartzera dator Amador, eta Devin Davis eta Doblasen atzetik eta Errumaniako Ionut Dragusin erraldoiaren aurretik, barneko jokoaren errotazioan hirugarren gizona izango litzateke, Nacho Martinen ordezkoa, donostiarren entrenatzaile Profirio Fisacek iaz LEB ligako talderako fitxatu nahi izan zuen arren.
Jokalaria bera pozarren azaldu zen hedabideen aurrean eta harrituta, era berean. «Pozgarria da ACBra igo den Bruesa GBC nitaz oroitzea eta pozgarria, halaber, Fisac entrenatzaileak niri deitu eta iaz ere taldean izan nahi ninduela esatea eta ACB mailara igota ere oraindik ni aintzat hartzea. Hiria oso gustuko dut, jendea ere bai eta gogotsu nago ACB liga noiz hasiko», esan zuen Alacantekoak.
Joko ezaugarriak
ACB mailako talde bateko kide izatea «erantzukizun handia» dela adierazi zuen: «Baina jokalari guztiei iristen zaie beren unea eta ederra da une hau edonorentzat», aitortu zuen Amadorrek.Bere joko ezaugarriei buruz zera esan zuen Amadorrek: «Lana eta intentsitatea dira nire ezaugarri behinenak. Asko daukat ikasteko eta lan handia egin beharko dut».
«Defentsan nahiko langilea eta agresiboa naiz. Erasoan, gazteago nintzela hegalean jokatzen nuen, baina gerora zona barrura sartuz joan naiz. Gustuko dut, dena den, kanpora atera eta urrundik jaurtitzea eta zenbait pibot baino azkarragoa naizenez, barneraldiak ere egitea, baina azken aldian barrutik jokatzen dut», aipatu zuen.
