Oporrak ezin direla diruaren truke ordezkatu dio epai batek
Europar Batasuneko Justizia Epaitegiak oporrak «giza eskubideen printzipio garrantzitsua» direla eta ezin direla diruaren truke ordezkatu nabarmentzen du atzo kaleratutako ebazpen batean. Dena dela, oporraldiak atzeratu daitezkeela dio, oporrak dagokion epean hartzea segurtasunerako eta osasunerako positiboa dela onartzen badu ere.
BRUSELAS
Europar Batasuneko (EB) Justizia Epaitegiak atzo kaleratutako ebazpen baten arabera, langileen oporraldiak ezin dira konpentsazio ekonomiko baten truke ordezkatu, langilearen eta enpresaren arteko lan harremana eten ez bada, bederen. Hain zuzen ere, epaiak dio oporrak Europako «giza eskubideen printzipio garrantzitsua» direla, eta Estatuek neurriak hartu behar dituztela langile bakoitzak gutxienez ordaindutako lau asteko oporraldia izan dezan. Ebazpen hori Holandako Sindikatuen Federakundearen eta herrialde horretako Lan eta Gizartekintza ministerioaren arteko auzi baten ondorioz etorri da.
Osasunerako onuragarriak Dena dela, oporraldiak lan segurtasunerako eta osasunerako onuragarriak direla onartzen badu ere, Europar Batasuneko Justizia Auzitegiak adierazten du oporrak atzeratu daitezkeela eta langileari dagokion epetik kanpo ezarri zaizkiola dagozkion opor horiek.
Hala ere, oporraldiak ekonomikoki konpentsatzeko aukera horrek Europako zuzentarauek bultzatutako helburua urratuko lukeela berresten du epaitegiak. Izan ere, gehiago irabazteko asmoz, oporrak diruaren truke ordezkatzeko proposamen bat langileak onartzeko tentaldia izan dezakeela dio.
|
