Azkar mugitzeko eskatu dio Odon Elorzak Zapaterori
MADRID
Odon Elorza Donostiako PSEko alkateak Gobernu espainolari «urgentziazko pausoak» emateko deia egin zion atzo, prozesuak dituen «une zorrotzak» gainditzeko.
Orain arte Gobernu espainolak halako pausorik ez duela eman esan, eta «logika demokratikoan» sartzen diren urratsak ematea beharrezkotzat jo zuen, TVEri egindako adierazpenetan. «Egiaren garaia» dela nabarmendu zuen Elorzak, eta «terrorismoa bukatzeko», «ausardia, gaitasuna eta Estatu zentzua» eduki behar dela gaineratu zuen Elorzak.
Bestetik, ilegalizazioaren auziari dagokionez, Elorzak zera uste du: «Ezker abertzaleko sektore muturrekoenak ez du konfiantzarik; ez baitute uste Gobernuak legalizazioaren alde egingo dutenik». Bide horretan «hainbat erabaki judizialek» ez dutela lagundu salatu zuen. Ilegalizazioaren auzian egin beharrekoak Batasunaren esku daudela uste du Elorzak, baina, prozesuari dagokionez, ez du argi une honetan aurrera egiteko eman beharreko pausoak noren esku dauden.
Bestetik, presoen hurbiltzea «presio sozialik gabeko egoera batean» egitea komenigarriagoa dela adierazi zuen Odon Elorzak.
|
