Segik ikur frankisten aurka egin du Azpeitian
AZPEITIA
Segi gazte erakundeak bere gain hartu du joan den irailaren 14an Azpeitiko hilerrian dagoen Erorien Gurutzean frankisten omenez jarritako ikurraren aurkako ekimena.
Heriotza haietatik 70 urte igaro direnean, altxamendu frankista goraipatzen duen ikurra kentzea aztertzen ari zen Udala, baina ez borondate propioz. Azpeitiko bizilagun batek Erorien Gurutzea delakoaren izenak kentzeko eskaera egin behar izan du Udalak gaiari ekiteko. Hala ere, EAk eta EAJk proposamena uztailean eztabaidagai izan bazuten ere, oraindik ez zuten oroigarria kentzeko inolako keinurik egin.
Segik Azpeitiko Udalaren «utzikeria» salatu eta «biktimak eta borreroak banatzea» beharrezkotzat jo du. Heriotza horiek guztiak 1936an «Euskal Herriaren aurka oinarritutako ofentsiba» baten eraginez izan zirela gaineratu du gazte erakundeak. «Gaur egun bezala, garai hartako ultraeskuindar faxistek inposaketa eta zapalkuntza bidez Euskal Herria suntsitzeko xedea zuten», mahai gaineratu du Segik.
|
