SAIL OFIZIALA: "Vete de mi", Victor Garcia Leonek zuzendua
Aita-semeen arteko gatazkaz, begirada mingotsa
DONOSTIA
Santiago (Juan Diego) adinean aurrera doan aktorea da, arrakasta handirik inoiz lortu ez duena. Azkenaldion, Ana du bikotekide (Cristina Plazas). Gauzak, nola edo hala, baina ondo doaz, itxuraz behintzat, harik eta Guillermo (Juan Diego Botto) agertu den arte. Santiagoren semea da Guillermo, 30 urtekoa. Ez du lanik, ezta lan egiteko gogorik ere. Hori da Victor Garcia Leonek zuzenduriko “Vete de mí” film espainiarraren abiapuntua.«Bide desberdinetatik, baina beren buruaren kaltetan etengabe ari diren aita eta semearen istorioa da, komedia mingots moduan kontatua», adie- razi zuen zuzendariak berak. Juan Diego Botto “Martin H”ri esker nabarmendu zen, eta atzo esan zuenaren arabera, film haren ifrentzua da Garcia Leonena. «Izan ere, ‘Martin H’ eta antzeko filmek gazteak begirunez tratatu ohi dituzte, eta gurasoak, berriz, zorrotz. ‘Vete de mí’k, aldiz, batzuk zein besteak gupida gabe astintzen ditu», esan zuen. Victor Garcia Leonek, Guillermo bezala 30 urteren bueltan dagoenak, zera gaineratu zuen: «Nire ustez, den-denak oso ‘ulerberak’ dira gazteokin. Egia da etxetik alde egitea-eta ez dela erraza, baina baita gazteok, askotan, kopeta galanta dugula ere. Horregatik filma ez da ‘ulerbera’ ez batzuekin, ez besteekin». Filmaren ardatz nagusietako bat Juan Diegoren eta Juan Diego Bottoren arteko aurrez aurrekoa da. Beteranoak gaztearen lana goretsi zuen, eta gazteak, beteranoarena. «Parean zenbat eta aktore hobea izan, gero eta hobeto egiten dugu», adostu zuten. Filmean, besteren artean, Esperanza Roy, Jose Sazatornil, Rosa Maria Sarda eta Iratxe Elorriaga ere aritu dira.
|
