Biarritzek bere maila ematen hasteko aukera du
·Zuri-gorriak sailkapeneko bigarren postuan egon arren, ez dabiltza joko onarekin
DONOSTIA
Biarritzek bere maila erakusten hasteko parada izango du gaur Albiren aurka, Agilera estadioan. Partida 18.30etik aurrera jokatuko da.
Biarritz sailkapeneko bigarren postuan dago 18 punturekin. Hala ere, zuri-gorriak ez dira jendeak itxaroten duen jokoa erakusten ari, orain arte, behintzat, beren mailatik nahiko aparte baitabiltza.
Gaur hobetzen joateko aukera dute, sailkapeneko behealdean dagoen Albi hartuko baitute. Berri onak dituzte, gainera, zuri-gorriek, Lievremont, Thion eta Gobelet itzuliko dira-eta deialdira, baita hamabostekora ere. Jadanik lesioak gainditu dituzte, eta gaur berdegunean izango dira berriro. Izango ez direnak Bobo eta Dupuy dira. Izan ere, biak min hartuta daude, eta oraindik ez dira osatu, eta gaur ezin izango dute partida jokatu.
Albiri dagokionean, aldaketa asko egingo ditu hamabostekoan, ez baita ahaztu behar asteartean berriro ere Liga izango dela, eta frantziarrek jokalari batzuei atseden eman nahi izan diete gaur Biarritzen jokatuko duten norgehiagokan.
|
