Zinemaldi alternatiboa Alde Zaharrean
DONOSTIA
Heldu den ostirala arte film luze eta labur batzuk ikusi ahal izanen dira Donostia zaharrean, Iñigo kaleko Bai Baiuan, baita telesail baten zenbait atal ere. Alde Zaharreko Gazte (eta Zaharren) Asanbladak antolatu ditu emanaldi horiek.
Gaur gaueko bederatzietan, Groseko Gazte Asanbladaren film laburra erakutsiko dute eta ondotik “Guerreros de Antaño” ikusi ahalko da. Bihar, 20.00etan, lanak kalean ematen ahaleginduko dira. Alde Zaharreko Gazte Asanbladaren film laburra eta Che Guevarak egindako bidaia kontatzen duen “Diarios de motocicleta” emanen dituzte. Ostegunean, “Gazteak” telesailaren atal bat eta “Requiem por un sueño” emanen dituzte 20.00etan, eta ostiralean telesailaren beste atal bat eta “V de Vendetta” ikusi ahalko dira 21.00etan. Ondoren, euskal anarkismoari buruzko mahai ingurua izanen da.
|
