Antena bat jartzea galarazi dute bizilagunek Basaurin
BASAURI
Basauriko San Miguel auzoko hogeiren bat bizilagunek Adif enpresak Sustapen Ministerio espainolean trenen azpiegiturez arduratzen dena auzoan antena bat jartzea eragotzi zuten atzo.
Antena jartzeko lanak goizeko lehen orduan hasi ziren. Goizean bertan izandako Bozeramaileen Batzordean Basauriko alkateak, Rafael Ibarguenek, beste alderdietako zinegotziei jakinarazi zien antena ezartzea legez kanpokoa izanez gero, debekatu egingo zuela. Hartara, Udaltzaingoa bidali zuen lanak egiten ari ziren gunera, baina ez zituzten lanak geldiarazi, Udalaren berak egindako aldeko txosten bat erakutsi baitzieten. 15.00ak aldera hogei laguneko bizilagun talde bat bertaratu, lanean ziharduen induskagailu baten gainera igo eta lanak gelditu zituzten.
Adif enpresak jakinarazi zuenez, jarri nahi duten antenak ez dauka zerikusirik telefonia antenekin; trenbide sarearen funtzionamendurako antena bat da. Gaineratu zutenez, modu horretako antenak jartzeko ez dute Udalaren baimenik behar, eta halaxe jakinarazi zioten Basauriko Udalari duela hilabete pare bat.
|
