EAJk 33 zuzenketa egin dizkie Estatuko aurrekontuei
MADRIL
EAJk 33 zuzenketa egin dizkie Estatuko aurrekontuei, 71 milioi euroko balioa dutenak. Horrelaxe zehaztu du alderdi jeltzaleak Gobernu espainolarekin aurrekontuen gainean lortu duen akordioa, Kongresuan duen eledun Josu Erkorekak atzo berriz esan zuenaren arabera, «erakundeen egonkortasuna» ardatz duena.
Aurkeztutako zuzenketa horietatik guztietatik, diputatu jeltzaleak aditzera eman zuen Ikerketa, Garapena eta Berrikuntza alorrari dagokionak biltzen duela sos gehien; zehazki, 50 milioi euro. «Hiru euskal herrialdeetako proiektu ezberdinetan inbertituko den dirua da», gaineratu zuen.
Erkorekak azaldu zuen Estatuko aurrekontuei gehi- tuko zaien beste zuzenketa batek frankismo garaian klandestinitatean lan egin zuten 200 bat andereñore- kin dagoen «zor historikoari» irtenbidea emateko helburua duela. «Izan ere, urte haietan ez baitzuten Gizarte Segurantzan kotizatu eta, ondorioz, erretiro-pentsioa zapuzturik geratu zitzaien», zehaztu zuen.
Urriaren 17an aurrekontuei aurkeztutako osoko zuzenketa atzera bota zuen EAJk, «azken orduan eta mirariz» adostutako hitzarmenaren ondorioz, alderdi jeltzaleak egun hartan esan zuenez. Bi egun geroago, Erkorekak, Bilbon emandako prentsaurrekoan, Rodriguez Zapateroren Gobernuarekin lortutako akordioa «erantzukizun keinua» izan zela bota zuen, «erakundeen egonkortasuna bermatzeko» eta «bake prozesuaren eta normalizazio politikoaren erronkei aurre egiteko».
|
