Astebeteko greba egingo dute Baionako abokatuek
BAIONA
Azaroaren 9an eta 16an Baionako auzitegiko abokatuek frantses Estatuko letratuekin batera greba egin zuten. Lanuztearen arrazoia «Laguntza judiziala» eskaintzeagatik jasotzen duten diruaren %15eko igoera eskatzea zen. Abokatuen eskaeren aurrean Estatuak erantzun egokirik ez duela eman ikustean, Baionako auzitegiko legegizonek eta emakumeek astebeteko greba deialdia egitea deliberatu dute. Greba azaroaren 27tik abenduaren 4ra arte egingo dute, eta lanuzte orokorra izanen da. Hau da, behar larrienean diren pertsonei ere ez diete laguntza juridikorik emango. Baionako abokatuek nabarmendu nahi izan zuten greba horrek ez duela «laguntza judiziala» jasotzen duten pertsonengan soilik eragingo, baizik eta epaitegietan aferak dituzten pertsona guztiengan. Letratuek beren ekintzek izanen dituzten ondorioez kontziente zirela adierazi zuten, baina Estatuaren ordaina egokia izatea gizarte guztiarentzako abantaila dela nabarmendu zuten. Azaroaren 9ko eta 16ko lanuzteen ondoren abokatuen eskaerak Legebiltzarrera eraman behar zituzten, baina Pascal Clement Justizia ministroak emendakin hori kentzeko eskatu zuen Legebiltzarrean eztabaidatu gabe. Hurrengo urteko aurrekontuetan %6ko igoera besterik ez da aurreikusten.
|
