- Donostiako 29. Maratoiaren aurkezpena
Errekorrak hautsi nahian dator aurtengo maratoia
DONOSTIA
Donostiako udaletxeko osoko bilkura aretoan aurkeztu zuten atzo igandean izango den Donostiako 29. nazioarteko maratoia, errekor mota oro hausteko ideiarekin.«Estatuan maratoirik garrantzitsuena» den honek IAAFek B mailako kategorian dauka Donostiakoa, Estatuko beste inork ez duena sekula baino parte-hartze joriagoa izango du. Izan ere, orain arte 2.000 korrikalarik izena ematean jartzen zuten maratoian parte hartzeko muga; aurtengo maratoirako, aldiz, egon den eskaria dela medio, 2.300 korrikalarik hartuko dute parte.
6.000 euro errekorragatik
Parte-hartzeaz gain, zenbait aldaketa egin dituzte igandean izango den lasterketarako. Horiek hala, goizeko 09.00etatik Madril hiribidetik abiatuko da aurten maratoia Anoetako atletismo estadiotik hasi beharrean hasieran sortzen den «inbutu efektua saihestearren», aipatu zutenez eta Gipuzkoako hiriburuko kaleetan zehar «zirkuitu azkar» bat diseinatu dute, 2002an Timothy Cherigat keniarrak ezarri zuen 2.09.34 denbora gainditzearren. Hala, errekorra hausten duen korrikalariak, irabazlearen 6.000 euroko sariaz gain, beste 6.000 euro ere jasoko ditu. Parte hartuko dutenen artean marka ezar dezakeen hautagai nagusia Kennet Cheruyot keniarra da, bere maratoirik bizkorrena 2.07.18 denborarekin amaitu baitzuen. «Erbi» lanak egiteko, berriz, Amraham Chalenga herkidea izango da. Emakumeen artean ez da marka hausterik espero, nahiz eta sari berbera aurrez ikusten den. Azkenik, Donostiako alkate Odon Elortzak herritarrei iganderako «pazientzia» eskatu zien, igande goizean izango diren zirkulazio etenengatik.
|
