BAIONA

Partida garrantzitsua da, batez ere etxekoentzat. Sailkapenean azken daude, baina taldea indartzen ari dela argi eta garbi erakutsi dute azkenaldian. Azkeneko hiru jardunaldietan garaile izan dira, eta garbi dago goranzko bidea hartu dutela.

Horixe bera esan zuen atzo Richard Dourthek, Avironek duen jokalaririk garrantzitsuenetakoak: «Gure Liga orain hasi da. Hastapenean ez dugu ezer egin, eta hemendik aitzinera egin baharra daukagu orain arte egin ez duguna. Azkeneko hiru partidak irabazita gatoz, eta jarraitu beharreko bidea hori da. Taldea inoiz baino hobeto ikusten dut, eta gogoz gaude Biarritz hartzeko», esan zuen lapurtarren jaurtitzaileak.

Liga hasieran Avironek zulo handia eduki zuen atzeko lerroetan, eta hortik partida askok ihes egin zieten. Orain, ordea, badirudi arazo hori ere konpondu dutela: «Atzean taldea sendo dago, eta hori da Avironen gakoetako bat. Irailean sartu zen Jean Pierre Elisalde manager lanak egitera, eta onartu beharra daukagu bere eskua nabaritzen dela», esan zuen Dourthek, eta Biarritzen aurka ere atzean egiten den lana garrantzitsua izango dela ekarri zuen gogora, zuri-gorriek entseguak egiteko abilezia handia baitute.

Biarritzentzat ere urteko partidarik garrantzitsuenetakoa izan ohi da Avironen aurkakoa. Esan beharrik ere ez dago bi talde horien artean maitasun handiegirik ez dagoela, eta taldeentzat bezalaxe, zaleentzat ere auzokoa menderatzeak sekulako garrantzia izaten duela. Hala ere, eta Avironen gorakada ikusita, neurketa zaila izango dela esan du Imanol Harinordokik, Biarrizko jokalariak: «Partida zaila izango da. Aviron hiru partida irabazita dator, eta derbi bat da, eta horrelako partidak berez izaten dira gaiztoak», esan zuen. Etorkizunari begira jarrita ere, irabazteak garrantzi handia duela adierazi zuen Harinordokik: «Partida hau irabaztea garrantzitsua da guretzat. Hau jokatu, eta beste hiru astetan ez dago Ligarik, Europako lehiaketak daudelako. Beraz, puntuak batu behar ditugu, Europara lasaiago heltzeko». Donibane Garaziko jokalariaren ustez, puntuek, ahal bada, entseguen bidez etorri behar dute: «Puntuak, ahal bada, entseguak eginda lortu behar ditugu. Irabazteaz gain, puntu gehigarriaren bila joan behar dugu. Ona litzateke Baionan bost puntuak batzea», onartu zuen Imanolek.

Festa-giroa