TITIN III-LASA III 22

BENGOETXEA VI-RUIZ 13

IRUÑEA

Oinatz Bengoetxeak eta Patxi Ruizek partida txukuna egin bazuten ere, zakur zaharrek ez zieten aukerarik eman. Gazteek tantoa egiteko eskujokoak egin behar zituzten eta beteranoek aldiz, pilotakada eraginkorrekin edo aurkarien hutsak itxarotearekin lortzen zituzten.

Lasak eta Titinek horretan maisu direla erakutsi zuten beste behin ere. Lehenak defentsan lan bikaina egin zuen; bigarrenak berriz, tantoa bukatzeko duen gaitasuna berriro kantxaratu zuen. 6-3koan adibidez, Triciokoak dejada batekin urdinek menperatutako tantoari bukaera eman zion; edo 19-12koan, Bengoetxeak bidalitako bi pareta beste bi paretakoa joaz erantzun zuen.

Partidaren lehen zatia, dena den, berdindua izan zen, erritmo ikaragarriarekin. Titinek bereak eta bi egin zituen aurreko koadroetan, baina Bengoetxea ez zen atzean geratzen. Titinek boleaz 2-1ekoa egin ondoren, Bengoetxeak antzeko beste bolea batekin berdindu zuen norgehiagoka hurrengo tantoan. Adibide bat besterik ez.

Gazteek Lasa nekatu eta Titin jokoan sartu ez zedin bilatzen zuten, baina estrategia ez zitzaien ondo atera: Lasak ia ez zuen akatsik egin Ruizek pilotakada pozoitsuak bidali arren, eta Titin, egindako hamalau tantorekin, jaun eta jabe izan zen. Ruizi txaparen gainera ihes egindako pilotakada baten ondoren 11-10 igo ziren markagailuan, baina hor amaitu zen urdinen erresistentzia. 11-3ko partzialarekin, partida zakur zaharren poltsikora joan zen.

Leitza eta Zearra, nagusi