Nazio eraikuntzarako heziketa beharrak aztergai
·NGBk «Urratsez urrats Euskal Unibertsitatea» jardunaldiak hilaren 27an egingo ditu Martin Ugalde Parkean
ANDOAIN
«Nazio Beharren irizpidea kontuan hartuta heziketa beharrak zein diren zehaztu eta jada osatzen ari den aurreproiektuaren arlo akademikoari nazio ekarpena egitea» da heldu den hilaren 27rako Andoaingo Martin Ugalde Parkean Nazio Garapenaren Biltzarrak (NGB) antolatu dituen jardunaldien xedea, Jagoba Zulueta eta Eneko Compains NGBko kideek azaldu zutenez.
«Urratsez urrats Euskal Unibertsitatea» izenburupean 11.00etatik aurrera garatuko diren jardunaldietan, orain zazpi hilabete hasitako lanaren emaitza aurkeztuko dute. Orduan, nazio garapenerako behar diren heziketa-beharrak eta egun dauden hutsuneak ezagutze aldera, kirol hezkuntzaren, immigrazioaren edota ekologismoaren arloan nazio eraikuntzan jarduten diren hainbat eragiletako kideengana jo zuten.
Haiengandik jasotako proposamenak batu dituzte dokumentu batean. «Ekarpen xumea baina baliotsua da, horrelako saioa lehendabiziko aldiz egiten delako eta, batez ere, hezkuntzaz kanpoko pertsonak inplikatzea lortu delako», azaldu zuten. Jardunal-dietan hizpide izango dira azterketaren helburuaren kokapena, Euskal Herriko Unibertsitate esparruaren gaineko azalaren argazkia, azterketaren ondorioen aurkezpena eta Euskal Unibertsitatea sortzeko konpromisoen beharra. Jardunaldiak irekiak dira eta NGBko kideek herritar guztiei egin zieten parte hartzeko gonbita.
|
