Lekarozen Sagardo Eguna eginda hasi da denboraldia Nafarroan
LEKAROZ
Garai batean, sagardoa baserri gehienetan egiten zuten Nafarroako herri askotan, baina ohitura hori galduz joan zen, eta sagardotegiei esker iraun du edari horren inguruko bestak. Sagarrondo gehiago landatu eta sagardoari bultzada emateko sortu zuten Nafarroako Sagardogileen Elkartea, eta urtero besta antolatuta hasten da denboraldia bertan.
Aurten, Lekaroz herriko Baztan Larraldea sagardotegian egin dute upeletako sagardoa dastatzeko bazkaria. Upelen aitzinean Sagar-dantza egin eta sagardogileen elkarteko kide batek ongietorria eman zuen. Iaz Lesakan izandako Sagardo Egunean Andoni Egañak egin bezala, lehenengo «txotx!»a Miguel Mindegia aizkolariak egin zuen atzo. «Ederra dago», izan zen bere epaia, eta ondoren beste kirolari batzuek segitu zuten sagardoa dastatzen, Otxandorena eta Goñi pilotariek eta Marta Mendia jauzilariak besteren artean. Bertsolariak ere han ziren, Manolo Arotzena, J.J. Zubieta «Etxabe», Juan Mari Lopez, Bittor Elizagoien eta Jon Elizetxe, baina horiek bazkarian indarrak hartu eta geroko utzi zuten saioa. Kirikoketaren eta txistularien saioaren ondoren hasi zen bazkaria.
GARArekin banatu zuten sagardoari buruzko gehigarrian Berueteko Txaseneko Borda elkartearen barruan dagoela esan arren, hortik kanpo dagoela zehaztu nahi izan dute.
|
