«Le portrait de l'infante et l'amour sorcier» Thierry Malandainen azkeneko sorkuntza Manolo Valdés eskultorearekin eginiko lanaren emaitza da. Azken horrek bi metro eta erdiko Meninak egin ditu, eta Ballet Biarritzeko koreografoa horietan oinarritu da bere azken sorkuntza egiteko. Maurice Ravel eta Fallaren konposizioak hartu ditu horretarako oinarri. Datorren asteetan Biarrizko publikoari aurkeztuko zaio lana, baita Zaragozako erakusketa unibertsalean ere.

Erosi berri duen XVII. mendeko marrazki bat ikusgai ipini du Untzi Museoak. Donostiako paisaia bat da, orain arte zeharo ezezaguna. Bonaventura Peeters artista flandestarrak egin zuen, 1652an. Untzi Museoko arduradunek nabarmendu dutenez, XVII. mendeko Donostiako irudi gutxi dago, eta are gutxiago Peetersena bezain bikainak.