MUZAFFARABAD

Talde islamiarrek, baita Pakistanen ofizialki legez kanpo daudenek ere ­normalean, «terrorismoarekin» lotura dutelakoan­, lurrikarak eskaini zien aukera baliatu zuten haien irudia hobetzeko, agintarien jarrera aldatzeko eta herritarren esker ona jasotzeko. Iazko urriaren 8ko lurrikara gertatu bezain laster, Pakistango Armada artean bere hildakoak zenbatzen ari zenean, isil-isilik bertaratu ziren, zalaparta handirik gabe. Ia sei hilabete igaro direnean, ezinbesteko bihurtu dira. Garai bateko armak eta itxurak utzi eta herritarrengana hurbildu dira. «Lurrikara gertatu aurretik hemen ginen, fede islamiarra hedatzeko. Bulegoak, medikuak eta boluntarioak genituen», esan du Ghulamullah Azad JD Jamaat-ud-Dawa taldeak Kaxmirren duen eledunak, Muzaffarabad hiriko kanpaleku bateko erietxearen atarian. Talde hori Laskhar-e-Taibaren oinordekoa da, agintariek 2002an legez kanpo utzi zuen taldearena. «Herrialde osotik iritsi zaizkigu boluntarioak. Mila inguru izatera iritsi ginen ­gehitu du eledunak, bere bizar zuriaren erdian irribarrea ageri dela­. Guk banatzen dugu amerikarren laguntza. Hemen zirujau amerikar bat eduki genuen lanean. Armadarekin eta nazioarteko gobernuz kanpoko erakundeekin ditugun harremanak ezin hobeak dira. Guztiek onartzen gaituzte eta herritarrek entzun egiten dute guk esandakoa, eta eskerrak ematen dizkigute», azaldu du Ghulamullah Azad JDko eledunak.

Wali Alamek 50 urte besterik ez ditu, baina askoz ere zaharragoaren itxura du. Balakot hirikoa da, lurrikarak %95ean suntsitu zuenekoa. «Arratsalde- rako hemen ziren, janariak banatzen. Jainkoak bedeinka ditzala. Inoiz ez dut ahaztuko haien laguntza», esan du.

Al-Rashid fundazioa ere legez kanpokoa da, baina lanean ari da Kaxmirren. Mohamad Shafiqek zuzentzen ditu Muzaffarabadeko operazioak. Gogoan du Pakistango Gobernuak taldearen kontuak blokeatu zituela 2002an. Ondorioz, eskudirua besterik ez dute erabiltzen. «Herrialde osoan biltzen dugu dirua, eta gero hona ekartzen digute. Banketxeko kontuak erabiltzeko aukera izan bagenu, askoz ere laguntza gehiago emateko moduan izango ginateke», esan du Shafiqek.

Pareta batean NBE Nazio Batuen Erakundeak egin duen zerrenda dago: «Zer egin behar den eta non». «Kanpalekuetako kudeaketa» kapituluan ageri da fundazioa, oso leku onean. «Nazioarteko GKE guztiekin egiten dugu lan. Hiltzaileak ez garela ikusteko aukera izan dute. Ez dut esan nahi musulman guztiak onak direnik, baina argi dago Mendebaldean zabaldu den mezua, musulman guztiak terroristak garela alegia, gezur hutsa dela», esan du.