AZPEITIA
Joseba Segurola eta Jabier Agirre herriko presoei sostengua adierazteko, asteburuan martxa bat egin zuten Azpeititik Douaiko eta Moulinseko kartzeletara. 40 bat herritar joan ziren Estatu frantseseko bi espetxe horietara, autobus batean.Autobusa ostiralean abiatu zen, 20.30 aldera, Etxerat-en elkarretaratzea amaitutakoan. Larunbat goizean heldu ziren Douaiko kartzelara (han dago preso Segurola). Parte-hartzaileek GARAri agertu diotenez, Elkartasun Komiteko bi kide zituzten zain, baita komunikabide bateko kazetariak ere.
Elkarretaratzea egin zuten, baita suziriak jaurti eta oihuak «Euskal presoak etxera», «Jo ta ke, irabazi arte»... egin ere. Aurretik, espetxeko zuzendariordeari idatzi bat helarazi zioten:«Josebaren egoera azal- tzeaz gain, bere oinarrizko eskubideak eta politikoak bermatzeko eskatzen genuen».
Douaitik Paris aldera abiatu zen autobusa, gaua han pasa eta igande goizean 11.00ak aldera Moulinseko kartzelara iristeko. Han ere bazen kazetaririk, eta protesta bezperakoaren tankerakoa egin zuten: elkarretaratzea, oihuak, suziriak... Martxa hasi zutenean, ostiralean, Agirre mitardean zegoen, baina igande goizean zigor ziegatik atera ei zuten. Hori dela-eta, bertaratutako bere lagunek bisita egiteko baimena eskatu zuten, eta kartzelako zuzendaritzak onartu egin zien.
Bisita bukatutakoan, 16.30- ean, Euskal Herrirako bidea hartu zuen elkartasun martxak. Azpeitira, astelehen goizaldeko 2.00etan iritsi zen autobusa.
Joseba Segurola bakartuta dago Douain eta Jabier Agirre, berriz, ospitalera eraman dezaten egin protesta batengatik zigortu egin zuten.
Azpeitiko Askatasunaren esanetan, martxa «benetan arrakastatsua» izan da, eta presoak herriratzeko eta estatus politikoa onartzeko eskatu du.
Presoen alde, atzo, 40 lagun mobilizatu ziren Iruñeko Alde Zaharrean, 50 Txantrean, 36 Arrosadian eta 75 Eibarren.
