Miguel Madariaga: "Apirila da Samuelen hilabete onena"
GASTEIZ
Samuel Sanchez Euskaltel-Euskadi taldeko asturiarrak bi etapa garaipen, atzoko bigarren postua eta jertsei horia soinean dituela ikusita, Miguel Madariaga talde laranjako zuzendari nagusia ohi baino lasaiago eta pozarren mintzatu zen atzoko etaparen ostean. «Gaurko etapa atzokoa laugarrena izan da, eta ikusten da jendearen indarrak beherantz doazela. Hala ere, Samuel oso ongi dago eta helmugara indarrez gainezka iristen da. Gero, taldeko lanak arazorik gabe eraman du eta helmugan ongi kokatu da Freireren atzetik. Horregatik amaitu du Gasteizen bigarren», adierazi zuen.Hala ere, zuzendari bizkaitarra ez zegoen harrituta Sanchezen gorputzaldi aparta ikusita. «Hauxe da Samuelen hilabetea. Apirila. Bere helburua apirileko klasika handiak Amstel Gold Race, Flecha eta Lieja dira, eta horregatik ez du igandean Zornotzako proban parte hartuko. Klasika handi horiek prestatuko ditu, han zerbait egiteko asmoa baitugu biok. Egon behar duen moduan dago Samuel», iritzi zion Miguel Madariagak. Bestalde, asturiarrak itzulia irabazteko dituen aukeren eta talde laranja egiten ari den lanaren gainean itxaropena eta kezka aipatu zituen aldi berean. «Samuelek irabaz dezake Euskal Herriko Itzulia, baina gauzek beren bidetik joan beharko dute horretarako. Biharko etapa gaurkoa oso konplikatua da. Azken etapetan taldea lan handia egiten ari da, eta baliteke Samueli gehiago lagundu ezin izatea eta liderra talderik gabe geratzea. Hori da gure beldurrik handiena. Larunbatera buruan iristen bada, baliteke orduan itzulia disputatzea», esan zuen. Liberty Würth taldeko Alberto Contadorrek, aldiz, zera esan zuen: «Lastima izan da Aitor Osa galtzea». «Nik neuk erlojupekora orain gauden moduan iristeagatik sinatuko nuke. Erlojupeko zaila da eta ongi datorkit», aitortu zuen.
|
