Barrutik ikusita, atzoko etapa benetan gogorra izan zen. Amaieran batez beste ateratako abiadurak hala salatzen zuen, behintzat. Lehenengo unetik azkenera arte, ez genuen arnasarik hartzeko astirik izan. Era berean, etapa oso urduria izan zen atzokoa, beti ihesaldi handiak, talde handiak sortu baitziren Herrera eta helmuga bitartean, eta noski, ihesaldi handi horiek arriskua zekarten tropelarentzat. Pare batek bakarrik egin izan balu ihes, bada, liderraren taldeak kontrolatuko zukeen, baina ihesaldi handi bat ez da erraz kontrolatzen. Horrek abiadura handia, urduritasuna eta desgaste itzela dakartza.

Azkenean Freire izan zen azkarrena eta Samuel Sanchez bigarren. Ikusten zen Rabobankek talde osoa jarri zuela atzo Freirerentzat lanean; izan ere, Euskal Herriko Itzulian ez dago esprinter gehiegi, eta daudenetan indartsuena Freire bera da. Bestetik, Samuelek zeruetan dauka morala, eta, gainera, txirrindulari osoa da, erlojupekoan huts egiten badu ere.

Zallara bidean ikusi behar jende asko edo gutxiko ihesaldia sortzen den, atzoko etapa bezain gogorra izango den edo ez ikusteko. -