Unibertsitate eredu propioa aldarrikatu dute
·Eztabaida «integrala» lortzeko eta ikasleen iritzia kontuan izateko eskubidea eta beharra dutela ikusten dute
GASTEIZ
Euskal Herriko unibertsitate ezberdinetako ikasleak Gasteizko Filologia fakultatean bildu ziren atzo, unibertsitate eredu propioaren inguruko eztabaida «integrala» eskatzeko. Egungo unibertsitateen gainean aplikatzen diren prozesu guztien inguruan «eztabaidatzeko» eta beren hitza kontuan izateko «eskubidea eta beharra» dutela aldarrikatu zuten.
Europatik ezarri nahi duten hezkuntza sistema berriari, Bologna prozesuari, «inposizio kiratsa» dariola nabarmendu zuten. Alde horretatik, «herri oso bati eragiten dion oldartzat» jo zuten.
«Galdu ezinezko tren hau» hartu nahi dutela arbuiatu zuten, «desinformazioa, ezjakintasuna eta prozesuarekiko sekretismoa besterik ez dagoen une honetan». Apurka-apurka, eguneroko bizitzan haren lehen ondorioak nabaritzen ari direla esan zuten gazteek. Alegia, euskara gutxiestea, materiaren «degradazioa» edota ikasleen arteko mailakatzea, besteren artean. Horregatik guztiagatik, Hezkuntza Deialdiarekin bat egin zuten.
|
