- Sokatira
Nuarbe da berriro ere irabazteko hautagai nagusia
DONOSTIA
Lur Gaineko Euskal Herriko Txapelketako bigarren jardunaldia jokatuko da, eta berriro ere 680 kilokoa izango da. Saioa bihar Azkoitian jokatuko da, 17.00etan hasita.Nuarbe, Gaztedi A, Gaztedi B, Goiherri, Mutriku eta Areso neurtuko dira, estreinako saioan aritu ziren bezalaxe. Aditu guztien ustez, pisu horretako txapela Nuarbe eta Gaztedi Aren artean omen dago.Lehen jardunaldian, ordea, Nuarbe nagusitu zen, eta badirudi gipuzkoarrak direla berriro ere garaipena lortzeko hautagaiak. Nuarbetarrek bihar irabaziko balute, txapela ia segurtatu egingo lukete, Gaztedik irabazten badu, berriz, azkeneko jardunaldian ez da emozio faltarik izango.
Nafarroakoa
Nafarroan, berriz, Launako Goma Gaineko Txapelketako bigarren jardunaldia jokatuko da etzi Urdazubin 17.00etan hasita. 320 kilotan, EHNE Nafarroa, Berriozar, Txantrea, Burlata eta Gure txokoa lehiatuko dira, eta B Multzoan, berriz, Amaiur, BKE, Errotaberri, Beti Gazte eta CAN Amaiur. Nesken 260 kilotan, aldiz, Sakana, Beriain eta Gure Txokoa dira parte hartuko duten hiru taldeak.
|
