115.000 sinadura Nafarroan hezkuntza duin eta euskalduna eskatzeko
IRUÑEA
Atzo goizean aurkeztu zituen Bai Eskolak Euskalduntzeari! ekimenak Nafarroako Hezkuntza departamentuan herrialde horretan bildu dituen sinadurak, herritarren hizkuntza eskubideak bermatuak izan daitezen eskatzeko; 107.768 guztira. Horrenbestez, argi geratu da beste behin ere irakaskuntza ereduaren gaineko kezka zeinen zabaldurik dagoen gizarte osoan. Nafarroaren kasuan, baina, esanahi berezia hartzen du aldarrikapen horrek jasotako atxikimenduak, euskarazko ereduan izena ematen duten ikasle guztiek euskara ikastea ez bermatzeaz gain, bide hori jorratu eta jarraitu nahi dutenek hainbat oztopo aurkitzen baitituzte. «Zona ezberdinen arabera larritzen diren egoerak gainditzen hasteko unea da», adierazi zuten Bai Eskolak Euskalduntzeari! ekimeneko ordezkariek. «Sinaduren bidez, horretarako beharrezkoak diren neurriak har ditzala eskatu nahi diogu Gobernuari», gaineratu zuten.
Elorri eta Errotxapean, 6.800
Bestalde, sinadurak aurkezteko ekitaldi horretan Areso, Errotxapea eta Mendillorriko hezkuntza arloko aldarrikapenak ere oso ozen entzun ziren. Azken bi horietako ikastetxeek ere sinadura bilketak egin dituzte euskarazko lerro gehiago aldarrikatu eta datorren ikasturterako aurreikusitako ikasle kopuruari aurre egiteko. Errotxapean 5.000 sinadura inguru bildu dituzte, eta 1.800 Mendillorrin.
|
