DONOSTIA

Harri-zulatzaileen zaleak ez dira haserre izango, etzi egun betea izango baitute. Etzi, 13.00etan hasiko dira saioak. Ordu horretan, Ortuellan, Aiego auzoan, eta Sondikan izango dira ekinaldiak. Aiegon, Burdin Gazteak eta Galdames neurtuko dira. Azken horiek dira txapela lortzeko faboritoetako batzuk, baina oraingoz ez dira beren maila erakusten ari. Sondikan, berriz, Jaizubia, Txoriherri, Sondika eta Gallarta neurtuko dira. Hondarribiko taldea sekulako denboraldia egiten ari da. Azpeitian galdu zuen apustua eta gero, garbi utzi du orduan baino gehiago egin dezaketela, eta egiten ari diren markak kontuan hartuta, garbi dago txapela lortzeko hautagai nagusietakoak direla.

Arratsaldean ere izango dute, ordea, kirolari horiek lanean jarraitzeko aukera, 18.30etik aurrera Muskizen neurtuko baitira Aldai Alde, Trapagaran, Arboleda, Errekatxo, eta Burdin Gazteak. Trapagaran da Liga irabazteko beste faboritoetako bat, eta horiek ere puntuak batzen jarraitzeko aukera ezin dute galdu. BurdinGazteak taldeak, berriz, bi ekinaldi egin beharko ditu etzi, eta ez dute atseden handiegirik hartzeko betarik izango.