Prozesu politikoa baldintzatzea dute xede estatu-erasoek, Batasunaren esanetan
ETA erakunde armatuak jarduerak eten zituela hiru hilabete betetzear den ho-netan, Estatu espainolak eta frantsesak oraindik modu positiboan ez dutela erantzun nabarmendu zuen atzo Batasunak. Estatuen erasoek berean jarraitu dutela salatu zuen Joseba Permachek, eta horiek larritzat jo bazituen ere, erasoek prozesu politikoa baldintzatzeko duten «intentzionalitatea» larriagotzat jo zuen. Euskal herritarrei, une hauetan, mobilizatzeko deia egin zien.
DONOSTIA
Euskadi Ta Askatasunak joan den martxoaren 22an jarduera armatua etengo zuela jakinarazi zuenean Batasuneko Mahai Nazionalak egindako agerraldian norabide zuzenean erantzuteko galdegin zien Estatu espainolari eta frantsesari. Hiru hilabeteren buruan, negatibotzat jo zuen ibilbidea Joseba Permach mahaikideak. «Ez dira zentzu positiboan erantzuteko gai izan», adierazi zuen. Are gehiago, Euskal Herrian irekitako «prozesu politikoa baldintzatzeko, elkarrizketa atzeratzeko eta, ahal izanez gero, sine die jartzeko» asmoa duten erasoek etenik gabe jarraitu izana deitoratu zuen. Hala nola, polizi kontrolak areagotzea, sakabanatze politikari eustea, atxiloketak, espetxera- tzeak eta 18/98 epaiketa bera izendatu zituen. «Erasoak larriak dira, eta are eta larrigoa da eraso horien intentzionalitatea», gaineratu zuen.
Elkarrizketa dinamikak areagotu Euskal Herrian egin beharreko eztabaida politikoan datza gakoa Batasunaren esanetan, eta horretarako ezker abertzalearen aurkako erasoek eten behar dutela azaldu zuen Perma-chek.«Ezin gara egun bat bai eta bestea ere Madrilera begira egon», esan zuen. «Euskal Herriko eragileek gai izan behar dugu akordio politikoan adosteko eta mahaia eratzeko prozesua azkartuko duen dinamikak abiatzeko», esan zuen. Errepresioa eten eta elkarrizketa eta negoziazioari eusteko deia egin zien Estatu espainolari eta frantsesari. «Diskrezioz baina sekretismorik gabe» elkarrizketa dinamika areagotzeko deia egin zien mahaikideak eragileei, horrela «mahaia ahalik eta azkarrena eratzeko».
Diskreziozko gidoi-trukea
G.M.
DONOSTIA Horrelako erasoen gainetik prozesuak aurrera jarraitu behar duela adierazi zuen Permachek, eta elkarrizketa politikoak aurrera jarraitzen duela, «diskrezioz baina sekretismorik gabe». Hala ere, alderdiei, egoeraren maila berean egoteko eta erasoei erantzuteko eskatu zien. Herenegun EAJrekin izandako bileraren harira, une hauetan, eztabaida politikoa hasteko oinarriak hitzartzeko alderdien artean gidoiak trukatzen dabiltzala azaldu zuen Permachek, nahiz eta, oraindik, hasi besterik ez diren egin. «Laster alderdi interesak alboratuko direla espero dugu», adierazi zuen mahaikideak, eta elkarrizketa indartzeko deia egin zuen.
|
