OIARTZUN

400 ikusle inguru batu ziren Pikoketan finala ikusteko, eta eguraldiak ere lagundu zuen. Belarra, berriz, ona zen, nahiz eta azken egun hauetako euriek apur bat nahastu egin zuen.

Finalean bi beterano eta bi berri ziren. Bazirudien bi neurketa ikusi behar zirela. Batetik, Aranalde eta Gabirondo gazteluarren artekoa, horiek txapelaren lehian, eta bestea azken postutik ihes egiteko, Alkorta eta Zuriarrainen artekoa. Hala ere, azken horrekin jendeak bazituen zalantzak, orain dela bi aste berak irabazi baitzuen Gipuzkoako kanporaketa oso lan ona eginda, baina pasa den astean EuskalHerriko kanporaketan azkena geratu zen, eta jendeak zalantzak zituen atzo zer egin zezakeen.

Hala ere, lau segalariak aritu ziren maila onean, eta egindako lanarekin ez dago aitzakiarik. Garbi dago Gipuzkoan Bizkaian baino askoz ere parekotasun handiagoa dagoela, eta hori baieztatzeko atzoko emaitzak ikusi besterik ez dago, Gipuzkoan askoz ere alde txikiagoak izan baitziren.

Sailetan Aranalde izan zen nagusi, hark amaitu zuen lehenengo, baina gero, pisuan, Gabirondok kilo gehiago moztu zituen. Azken egun hauetako euriek belarraren pisua behera bidali zuten, eta horretan Gabirondok hobeto asmatu zuen, belarra beheragotik moztu baitzuen. Dena dela, lau segalariek egin zuten oso lan txukuna, eta belardia nola geratu zen ikustea pozgarria da, oso dotore utzi zuten-eta. Zigorra Aranaldek bakarrik jaso zuen, eta 20 kilo kendu zizkioten. Dena dela, horrek amaieran ez zuen inongo eraginik izan, 200 kilotik gorako aldea atera baitzion Gabirondok Aranalderi.

Txapelduna, gustura

Atzoko gakoa non egon zen ere esan zuen: «Belarraren pisua goitik behera etorri da azkeneko euri horiei esker, eta uste dut belarra behetik mozterakoan asmatu egin dudala», esan zuen. Hurrengo erronka Euskal Herrikoa izango da.