Antxoarako laguntza eskasak salatu dituzte
BILBO
Antxoaren arrantzaldiarengatik Madrilek eman beharreko laguntzen inguruan «manipulazioa, iruzurra eta intoxikazioa» egiten ari direla salatu zuen Gipuzkoako Kofradien Federazioko lehendakari Jaime Tejedorrek. Hasieran, gehienez eguneko 85 euro banatuko zituztela esan zuten «publikoki», eta orain gehienez ere eguneko 45 euro emango dituztela aipatu dute. «Gertaerarik hoberenean 20 egun izango dira», azaldu zuen. Radio Euskadin egindako elkarrizketa batean Bizkaiko eta Gipuzkoako arrantzaleak ez direla «ezer egin gabe» geratuko gaineratu zuen. «Ez dago eskubiderik; lehenengo 85 euro izango zirela esan zuten eta orain batzuek bi euro eta erdi bakarrik jasoko dute; paradoxikoa da hori», esan zuen. Gipuzkoako kofradien lehendakariak gogorarazi zuen Arrantzako zuzendari nagusi Alberto Lopezek antxoaren arrantzaldian bertan dena konponduko zutela eta eguneko 85 euro emango zituztela agindu zuela.
|
