BAIONA

Liga hasiera makala izan dute bi euskal taldeek, baina batez ere Avironek; izan ere, jokatutako bi neurketak galdu baititu. Liga hasiera samurra izatekoa zen zuri-urdinentzat, Ligako lehendabiziko bi partidetan mailara igo berri diren bi talderen aurka jokatu behar baitzuen. Ustez, bi talde horiek denboraldiaren amaieran beheko postuetan egon behar zuten, eta Avironek irabazteko modukoak ziren.

Usteak, ordea, ustel atera dira, bi partida horiek galdu baititu Avironek, eta sailkapeneko azkeneko postuan jarri da. Egoera horrek argi gorri guztiak piztu ditu Lapurdiko hiriburuan. Aurreko bi denboraldietan estutasun asko pasatu dituzte mailari eusteko, eta aurten lasaiago ibiliko zirelako itxaropena zuten, baina inork uste ez bezala hasi dute sasoia. Kezka dezentea sortu dute jarraitzaileen artean. Hala eta guztiz ere, Liga hasi besterik ez da egin, eta oraindik badago guztiari buelta emateko astia. Horregatik, gaurko neurketa garrantzitsua izango da bientzat, baina oso zaila.

Biarritzen zelaian irabaztea oso zaila da. Gaur galduta, gaizki jarriko dira eta urduritasuna azaltzen ere has daiteke leku batzuetan. Hala ere, orain dela bi urte garaipena eskuratu zuten Biarritzen, eta aurten ere posible dela ikusten dute Baionan. Are gehiago, zuri-gorrien hasiera oso ona izan ez dela ikusita, uste baino motelago ekin baitiote denboraldiari.

Izan ere, Biarritzek jokatu dituen bi partidetatik bakarra irabazi du, eta bestea, galdu. Ustez aurkari samurrak zituzten euskaldunek, baina horiei ere gauzak ez zaizkie nahi bezala joan. Ligako lehen partida irabazi zuten, baina itxura nahiko kaskarra eman zuten. Joan den astean, berriz, Narbonnen, oso gaizki aritu ziren, eta etxera esku hutsik etorri behar izan zuten zuri-gorriek.

Gaur Avironen aurka galtzea sekulako deskalabrua izango litzateke; min handia egingo lieke bai jokalariei bai eta zaleei ere. Maila nagusian Avironek daramatzan bi denboraldietan bietako inork ez ditu irabazi bi partidak. Orain bi urte, Avironek Biarritzen irabazi zuen, eta Biarritzek Baionan. Iaz, berriz, talde bakoitzak bere zelaian puntuak eskuratu zituen.

Jokalariei dagokienez, Biarritzen August eta Traille ez dira jokatzeko moduan egongo, eta litekeena da gaur Bobo aritzea. Orain arteko partidetan ezin izan du minutu bat bera ere jokatu, baina gaur berdegunean izatea espero dute.

Avironek, aldiz, hutsune asko izango ditu gaur Agileran. Izan ere, Pez, Davies, Lhande, Ngog, Coetzee, Tewhata, Garcia, Dourthe, Bergez eta Nuñez-Piossek ez baitira jokatzeko moduan.

Beste alde batetik, Avironek datorren igandean Perpinyaren aurkako partida ere Agileran jokatuko du; izan ere, Jean Dauguerren jokatu ezinik jarraitzen baitu.