BIARRITZ
“La Mariposa Negra” filma asteazken arratsean eman zuten Biarrizko zinemageletan. Bi emakumeren arteko topaketak eta elkartzeak beren bizian duten eragina agerian jarri nahi izan du Francisco Lombardi peruarrak, 2003an Biarrizko jaialdian sari nagusia eskuratu zuen zinemagileak.Peruko errealitate politikoa azalduta, zinemagileak esan zuenez, film horren bidez pertsonaien izaera ezberdinak nabarmendu nahi izan ditu.
Emakume batek epaile batekin ezkondu behar du, baina hori gertatu aitzin ezkongaia hiltzen dute. Emakumeak, senargaia nork hil duen jakin nahian, ikerketari ekiten dio, eta berehala Peruko mafiarekin topo egiten du.
Filmaren bidez salaketa politikoa egin nahi izan zuenentz galdetu zioten, eta Lombardik argi utzi zuen “La Mariposa negra” fikzio hutsa dela. Eta, filmean agertzen diren bi emakumeen artean sortzen den adiskidetasuna kontatu nahi izan duela berretsi zuen.
Baina Latinoameriketan girotzen dela-eta, filmak bere herriko errealitatea ere agerian jartzen duela onartu zuen.
Biarrizko jaialdian azken hiru egunotan proiektatu dituzten filmak kalitate ezin hobekoak direla aipatu dute, oro har, ikusleek. Baina, halere, azaldu dituztenen artean lehen egunean eman zuten Juan Carlos Rulfo zinemagile mexikarraren “En el hoyo” filma eta “La Mariposa Negra” izan dira arrakastatsuenak.
Bestetik, igandean arratsaldeko bi eta erdietan eginen duten sari banaketa arte, Oscar Cardenas zinemagile txiletarraren “Rabia”, Adrian Caetano argentinarraren “Despues del mar”, Jorge Duran brasildarraren “Proibido proibir”, Marcelo Bertalmio Uruguayko zinemagilearen “Ruido” eta Damian Szifron argentinarraren “Tiempo de Valientes” emanen dituzte fikzio sailean.
