Bost eraso saio aldarrikatu dituzte Baionako Udaltzaingoan oharra utzita
BAIONA
Polizia Judizial frantseseko Zuzendaritzaorde Antiterrorista Lapurdin eginiko bost sabotaje ahalegin ikertzen ari da, polizia iturriak aipatuz atzo Efek jakinarazi zuenez. Zehazki, ekintzon aldarrikapena aztertzen ari ei da, duela egun batzuk Baionako Udaltzaingoaren bulegoetan utzi baitzuten bere gain hartzen zituen oharra.Iturri beren arabera, aldarrikapena Irrintzi izeneko talde batek egin du: abuztuan Defentsa ministro eta Donibane Lohizuneko auzapez ohi Michelle Alliot-Marieren etxe ondoan, Ziburun, jarritako lehergailua aipatzen du; eta apirilean, Kanboko turismo bulegoaren ondoan, Biarrizko aireportuan eta Baionako Suprefeturaren alboan zeuden hiru edukiontzitan etxean eginiko lehergailu bana sartu izana. Aldarrikapena egiten den idatzian, «Euskal Herria ez dago salgai» esaldia baliatzen dutela gaineratu zuten, eta Estatu frantsesari eskatzen diotela gatazka gainditzeko prozesuan parte har dezala. Hain justu, bi esamoldeok erabili omen zituen komunikatzaile anonimo batek edukiontzietan jarritako lehergailuen berri emateko Poliziari deitu zionean. Oharrak, iturrion esanez, honakoa ere badio: «Euskal Herri osoan elkarrizketa politikoa egiteko, gure antolakundeak beharrezko neurriak erabiliko ditu».
|
