Herriko zaharrenek ere inoiz horrelakorik ikusi gabeak zirela aitortu zuten. Zikoina talde eder batek hartu zuen herenegun iluntzean Hernani. Arratseko seiak aldera iritsi ziren. Hegaldi elegantearekin, herriko txoko eta bazterrak ikuskatzen denbora handi samarra igaro ostean, elizako kanpandorrea iruditu zitzaien nonbait gaua pasatzeko tokirik aproposena. Bertan pausatu ziren, kanpandorreko ertzetan eta udaletxeko teilatuan. Herritarrek gozamen ederra hartua dute, ez baita egunero jasotzen tankera horretako bisitarik. «Ederra irudia, ederra», horrela deskribatu zuen bizilagun batek zikoinek kanpandorrean osatutako irudia.

Ez zuten berehalakoan pentsatuko zikoinek herrian horrenbesteko zalapartarik sortu behar zutenik. Hizpide nagusi bilakatu ziren herrira iritsi zirenetik. Interesa, batzuei; jakin-mina eragin zion besteren bati; atzo gaueko haizetearekin kanpandorrean nola eusten ote ziren galdezka baitzebilen bateren bat.

Zalaparta eragin bai, baina zarata handirik atera gabe utzi zuten herria. Eguzkiaren lehen izpiak agertzearekin batera iratzarri eta abiatu baitziren, oraindik irudi eder hori ikusteko aukera izango zutela uste zutenen etsipenerako.

Bizilagunentzat aparteko gauza izan bada ere, Alberto Luengo Plaiaundi parke ekologikoan lan egiten duenak jakinarazi zuenez, egunotan negua pasatze aldera eremu epelagoen bila dabiltzan hegazti kopurua handia da, baita zikoinena ere.

Luengok nabarmendu zuen zikoinek taldeka, binaka edota bakarka ere egin dezaketela migrazioa. Bidean, atseden hartzeko geldialdiak egin ohi dituzte, eta okasio honetan Hernaniri tokatu zaio zikoinen logela bilakatzea.

Luengoren esanetan, zikoinek penintsulan bertan igarotzen dute negua. Alde horretatik, migrazio ohituretan izan dituzten aldaketak nabarmendu zituen. «Lehen, hegazti migratzailearen adibide ziren zikoinak; orain, zenbait zonatan mugitu ere ez dira egiten», nabarmendu zuen.

Haren esanetan, horretan zeresana izan dute, batetik, tenperatura igotzeak, eta bestetik, jan iturriak ugaritzeak. «Erregadioak ugaritu egin dira eta bertan egon ohi diren igel, zapo eta karramarroak jan ohi dituzte; bestalde, zabortegietan ere makina bat jan aurkitzen dute».-