ANGELU

Lehen zati dotorea egin zuten Hormadiko jokalariek. Azkeneko emaitzek eraginda-edo, Angers lasai samar kantxaratu zen, partida zaila izango ez zelakoan. Baina lapurtarrek gogoz ekin zioten partidari eta lehen hogei minutuetan erakutsitako nagusitasuna baieztatzeko, lehen atsedena hartzeko 50 segundo besterik geratzen ez zirenean, Daramik gorri-berdeen gola egin zuen.

Bigarren zatian, Angers oso gogotsu abiatu zen. Markagailuan atzetik joate horrek eragina izan zuen eta partidari ahalik eta azkarren buelta emateko asmoz kantxaratu ziren, atsedenean entrenatzaileak esandakoak eragina izan zuela erakutsiz. Bigarren atsedena hartzeko zazpi minutu geratzen zirenean lortu zuten frantziarrek bigarren gola, eta 1-2 aitzineratu ziren. Lapurtarrek, ordea, ongi erreakzionatu zuten eta bigarren atsedena hartzeko hiru minutu eta erdi geratzen zirenean Favreauk berdinketa lortu zuen.

Azkeneko zatia, ordea, ez zen euskaldunentzat ona izan, nahiz eta hastapenean gauzak bestelako itxura izan zuten. Garbocz poloniarrak lapurtarren hirugarren gola egin zuen eta Hormadi 3-2 aitzineratu zen. Hiru minutu geroago, ordea, kanpotarrek berriro ere berdindu egin zuen.

Hormadi ez zen kikildu, eta aurrera jo zuen, eta Marechalek, berriro ere aurretik jarri zituen euskaldunak, baina hortxe amaitu zen partida etxekoentzat.

Angersek erreakzio indartsua izan zuen, eta oso minutu gutxitan hiru gol egin zituen, norgehiagoka erabakita utziz. Hormadiren ahalegin guztia alferrikakoa izan zen, gauzak nahiko ongi egin zituen, azkenaldiko partidarik onenetakoa egin zuen, baina neurketako azkeneko zortzi minututan esku-eskuan zuen partidak ihes egin zion, nahiz eta ilusioa apur bat indartu egin duten.